Jon 4 | NdeIBE | STEP | Kodwa uJona wacaphuka kakhulu wazonda.

Jonah 4

Ukunengwa KukaJona Ngesihawu SikaJehova

1 Kodwa uJona wacaphuka kakhulu wazonda.

2 Wakhuleka kuJehova wathi, “Hawu Jehova, kakusikho lokhu yini engakutshoyo ngisesekhaya? Yikho okwangenza ngaphangisa ukubalekela eThashishi. Ngangikwazi ukuthi unguNkulunkulu olomusa lesihawu, ophuza ukuthukuthela njalo ogcwele uthando, uNkulunkulu odedayo ongasoze ehlise ukuhlupheka.

3 Khathesi-ke Jehova, susa ukuphila kwami, ngoba kungcono kimi ukufa kulokuphila.”

4 Kodwa uJehova waphendula wathi, “Kambe ubona ulelungelo na lokuthi uzonde?”

5 UJona waphuma wayahlala endaweni ethile ngempumalanga kwedolobho. Wazenzela khonapho idunjana wahlala emthunzini walo walindela ukubona okwakuzakwenzakala edolobheni lelo. 6 Kwasekusithi uJehova uNkulunkulu wakhulisa ivini lanaba lasitha uJona lamenzela umthunzi ekhanda lakhe ukuze ahlaliseke. UJona wathaba kakhulu ngaleli ivini. 7 Kodwa emathathakusa ngelanga elilandelayo uNkulunkulu wathumela impehlane, eyaphehla isihlahla sacina sibuna.

8 Kwathi ilanga seliphumile uNkulunkulu wathumela umoya wempumalanga ohaqazayo, ilanga lavutha phezu kwekhanda likaJona waze waqaleka. Wafisa ukufa, wathi, “Kungcono kimi ukuthi ngife kulokuthi ngiphile.”

9 Kodwa uNkulunkulu wathi kuJona, “Ulelungelo na lokuthi uzonde ngenxa yalelivini?” UJona wathi, “Yebo. Ngizondile kubi, kuthi kangife.”

10 Kodwa uJehova wathi, “Uyazihlupha ngevini leli loba ungazange ulinakekele loba ulikhulise. Lihlume ngobusuku laphinde lafa ngobusuku. 11 Kodwa iNineve ilabantu abeqa izinkulungwane ezilikhulu elilamatshumi amabili abangehlukanisiyo isandla sabo sokudla kwesenxele, lezinkomo ezinengi njalo. Bekungafanelanga yini na ukuthi ngilinqinekele idolobho elikhulu kangaka?”